Innan Alþjóðahvalveiðiráðsins hefur verið greint milli fjögurra stofna hrefnu í Norður-Atlantshafi sem halda til við Kanada, Vestur-Grænland, í miðju Norður-Atlantshafi og í Norðaustur-Atlantshafi. Þessi skipting byggðist aðallega á útbreiðslu veiðanna, merkingum og lífssögulegum þáttum. Nýlegar rannsóknir sem byggjast meðal annars á erfðafræði, styrk mengunarefna og samsetningu ísótópa styðja í meginatriðum ofangreindar tilgátur um stofngerð í Norður-Atlantshafi en benda þó til að hrefnur í Norðursjó séu frábrugðnar þeim sem norðar eru við Noreg. Íslenska hrefnan tilheyrir svokölluðum Mið-Norður-Atlantshafsstofni (MI) sem heldur sig að sumarlagi á svæðinu frá austurströnd Grænlands, um íslenska hafsvæðið og austur fyrir Jan Mayen.

Til baka