Til að geta lagt mat á hlutverk hrefnu í
vistkerfinu á Íslandsmiðum þarf
að liggja fyrir vitneskja um dreifingu hennar og fjölda
á mismunandi árstímum. Hingað til
hefur áhersla verið lögð á hvalatalningar
um mitt sumar þegar fjöldi hrefnunnar er mestur
(sjá
mynd). Hámarksfjöldi og dreifing um hásumar
eru því tiltölulega vel þekkt. Fjöldi
og dreifing hrefnunnar að vori og hausti verða könnuð
með talningum frá flugvélum og skipum
annars vegar og hins vegar með gervitunglamerkingum.
Flug- og skipatalningar - Við hvalatalningar
er siglt eða flogið eftir fyrirfram ákveðnum
leitarlínum og allir hvalir sem til sést eru
skráðir. Gert er ráð fyrir að
allir hvalir sem koma upp á yfirborðið á
ákveðnu belti sitt hvoru megin leitarlínunnar
sjáist. Heildarfjöldi hvala á svæðinu
er síðan fenginn með því að
margfalda fjöldann með hlutfalli leitarbeltisins
af heildarflatarmáli svæðisins og með
því að leiðrétta gögnin
fyrir þeim fjölda sem áætlað
er að sé í kafi.
Upplýsingum um útbreiðslu hrefnu auk
annara hvala á mismunandi árstímum
hefur verið aflað með talningum í skipaleiðöngrum
í tengslum við önnur verkefni Hafrannsóknastofnunarinnar.
Þannig hafa gögn frá fyrri árum
safnast í reglubundnum vorleiðöngrum í
maí og seiðaleiðöngrum í ágúst.
Í júní 2003 var einnig talið í
karfaleiðangri á Árna Friðrikssyni
djúpt suðvestur af landinu (sjá
mynd).
Vegna þess hversu erfitt getur verið að
koma auga á hrefnur nema við bestu skilyrði
eru talningar af skipum ekki góður kostur fyrir
hrefnutalningar. Þá getur reynst betur að
telja hrefnur úr flugvél þar sem mögulegt
að færa talninguna fljótt milli svæða
eftir því sem veður er hagstæðast
hverju sinni og tryggja að eingöngu sé talið
við bestu aðstæður.
Gervitunglamerkingar - Með gervitungalmerkingum
þar sem rekja má ferðir einstaklinga í
gegnum gervinhött er vonast til að bæta megi
við upplýsingar um far hrefnunnar umfram það
sem fæst í talningum. Lítið er vitað
um ferðir hrefnunnar hér við land utan árlegar
ferðir meginhluta stofnsins upp á landgrunnið
að vori og brotthvarf að hausti. Vetrarstöðvar
hrefnunnar í Norður Atlantshafi eru óþekktar
Ekki er ljóst að hve miklu leyti einstakir hvalir
eru staðbundnir á sumrin eða flakki á
milli svæða.
Til baka
|