Vísindanefndir NAMMCO og IWC samþykktu árið
2003 nýtt mat á stofnstærð hrefnu
hér við land sem byggt var á talningunum
árið 2001. Einnig hefur nefndin endurskoðað
eldri útreikninga í ljósi framþróunar
í úrvinnsluaðferðum flugtalninga.
Endurskoðun á gögnum úr flugtalningu
frá 1987 leiddi til að punktmat er nú
19.200 hrefnur á þeim tíma. Þetta
er lítil breyting frá fyrra mati og mat úr
skipatalningu á djúpslóð er óbreytt,
þannig að heildarmat fyrir Mið-Atlantshafsstofninn
úr talningunni 1987 er eftir sem áður
talið um 28.000 hrefnur. Samkvæmt talningunum
2001 voru 43.600 hrefnur á flugtalningasvæðinu
sem nær yfir landgrunn Íslands.
Niðurstöður talninga frá skipum benda
til að um 23.600 hrefnur hafi verið utan flugtalningasvæðisins.
Þótt matið úr flugtalningunum sé
meira en tvöfalt hærra en matið frá
1987 er munurinn ekki marktækur vegna hárra
vikmarka. Við samanburð á gögnum úr
þeim fjórum flugtalningum sem fram hafa farið
á tímabilinu 1986-2001, kemur fram að
svipaður fjöldi sést á hverja leitarstund
á sömu svæðum í öllum
talningunum. Í heildina benda talningarnar til að
stofninn hefur verið stöðugur eða aukist
lítillega á þessu tímabili.
|