Allt frá því að reglulegar hvalatalningar
hófust hér við land árið 1986
hafa alþjóðlegar vísindastofnanir
fjallað um niðurstöðurnar og metið
ástand hrefnustofnsins hér við land. Slík
úttekt var síðast gerð á vegum
vísindanefndar NAMMCO árið 2003 og byggðist
á niðurstöðum talninganna 2001 ásamt
eldri gögnum. Ljóst er að fyrirhugaðar
hrefnuveiðar í vísindaskyni munu ekki
hafa merkjanleg áhrif á stofninn.
Samkvæmt þeirri úttekt er stofnstærð
hrefnu hér við land nú nálægt
því sem talið er að hún hafi
verið áður en veiðar hófust. Þetta
gildir hvort sem litið er á Mið-Atlantshafsstofninn
í heild sinni eða eingöngu hrefnur á
íslenska strandsvæðinu. Þær
veiðar sem stundaðar voru á síðustu
öld hafa samkvæmt því haft hverfandi
áhrif á stofnstærðina. Samkvæmt
öllum þeim forsendum sem vísindanefndin
taldi raunhæfar eru hverfandi líkur á
að árlegar veiðar á 200 hrefnum næstu
20 ár muni færa stofninn niður fyrir 80%
af upprunalegri stærð. Á sama hátt
er ólíklegt að árlegar veiðar
á 400 hrefnum færi stofninn niður fyrir
70% á sama tímabili. Einnig er ljóst
að hrefnuveiðar þær sem hófust
2003 í rannsóknaskyni og nema samtals 200
dýrum á 3-4 árum, munu ekki hafa teljanleg
áhrif á stofninn. Þessar niðurstöður
um ástand hrefnustofnsins hér við land
eru í samræmi við eldri úttektir
vísindanefnda NAMMCO og IWC. Af ofangreindum úttektum
er ljóst að árlegar veiðar á
bilinu 200-400 hrefnur á íslenska landgrunninu
samrýmast markmiðum um sjálfbæra
nýtingu hrefnustofnsins, enda er almennt viðurkennt
meðal fræðimanna að kjörnýtingarstærð
hvalastofna liggur á bilinu 60-72% af upphaflegri
stærð.
|