Hvers „virði” eru rannsóknirnar?
Umræðan um hvalveiðar hefur á seinni
árum færst æ meira frá umhverfismálum
(t.d. um sjálfbærni veiða) yfir í
pólitík eftir því sem upplýsingar
um ástand stofna hafa orðið áreiðanlegri.
Meginástæðan fyrir allsherjarbanni Alþjóðahvalveiðiráðsins
á hvalveiðum í atvinnuskyni sem tók
gildi árið 1986 var óvissa um ástand
flestra hvalastofna heimsins og voru aðildarþjóðir
ráðsins hvattar til að nýta þau
fjögur ár, sem bannið átti upphaflega
að standa, til rannsókna á hvalastofnum.
Þrátt fyrir að lengi hafi legið fyrir
óyggjandi vitneskja um gott ástand margra
hvalastofna, og reyndar bágt ástand annarra,
hefur allsherjarbanninu enn ekki verið aflétt.
Á undanförnum árum hefur sama þróun
hefur orðið í umræðunni hér
á landi og efnahagsmál verið ofarlega
á baugi. Einkum hafa tvö sjónarmið
verið uppi í því sambandi.
1)áhrif hvalveiða á ferðaiðnaðinn,
einkum hvalaskoðun,
2) áhrif fjölgunar hvalastofna
á afrakstur fiskveiða.
Miklar upphæðir hafa verið nefndar í
þessu sambandi. Samkvæmt nýlegri könnun
sem samtök hvalaskoðunarfyrirtækja létu
gera eru efnahagsleg áhrif hvalaskoðunariðnaðarins
1.7 milljarðar á ári. Á hinn bóginn
hafa jákvæð efnahagsleg áhrif hvalveiða
verið metin um 5 milljarðar á verðlagi
ársins 1997. Ljóst er að mikil óvissa
er varðandi forsendur beggja þessara útreikninga.
Veigamikill þáttur í ofangreindum útreikningunum
á þjóðhagslegri arðsemi hvalveiða
byggir á mati á afráni hvala, einkum
hrefnu, hér við land og hugsanlegum áhrifum
þess á afrakstur þorskstofnsins. Mikil
óvissa er um þessar niðurstöður,
einkum vegna mjög takmarkaðra gagna um fæðu
hrefnu hér við land. Í ljósi þess
hve umræðan um efnahagslegar hliðar hvalveiðimála
byggir á veikum grunni er afar mikilvægt að
afla frekari gagna á þessu sviði, svo minnka
megi óvissuna um hlutverk hrefnu í vistkerfi
hafsins við Ísland, ekki síst í
ljósi síaukinnar áherslu á mikilvægi
fjölstofna veiðistjórnunar í hafinu.
Meginmarkmið yfirstandandi rannsókna Hafrannsóknastofnunarinnar
á hrefnu er einmitt að varpa frekara ljósi
á fæðuvistfræði hrefnu við
Ísland.
Til baka |